කටුනායක උණුසුම් කළ හදිසි සෝදිසි මෙහෙයුම

ඉන්දියාවේ චෙන්නායි නුවර සිට කටුනායක ගුවන්තොටුපොළ වෙත පැමිණි ගුවන් යානයක් තුළ සැක කටයුතු පිරිසක් සිටින බවට එරට ගුවන්තොටුපොළේ සිට කටුනායක ගුවන්තොටුපොළ වෙත ලද තොරතුරක් මත කටුනායක ගුවන්තොටුපොළේ අද (03) විශේෂ සෝදිසි මෙහෙයුමක් සිදු කර තිබෙනවා.

කෙසේනමුත් මෙම සෝදිසි මෙහෙයුමේදී කිසිවෙකු අත්අඩංගුවට ගෙන නොමැති බවයි ගුවන්තොටුපොළ විවිධ ආරක්ෂක අංශ වලට සම්බන්ධ ආරංචි මාර්ග පවසන්නේ.

අද (03) උදෑසන 11.26 ට ඉන්දියාවේ චෙන්නායි නුවර සිට ශ්‍රී ලන්කන් ගුවන් සේවයේ යූ.එල්.- 122 දරන ගුවන් යානය කටුනායක ගුවන් තොටුපොළ වෙත පැමිණ තිබූ අතර එම ගුවන් යානය තුළ කාෂ්මීරයේ පෙහෙල්ගාම් ප්‍රහාරයට සම්බන්ධ බවට සැකකෙරෙන ත්‍රස්තවාදීන් 6 දෙනෙකු සිටින බවට ලද තොරතුරක් මතයි මෙම විශේෂ සෝදිසි මෙහෙයුම සිදුකර ඇත්තේ.

එසේම පැමිණෙන පිරිසගේ ගමන් බලපත්‍ර අංක, ඡායාරූප කිසිවක් ගුවන්තොටුපොළ වෙත එවා නොමැති, අසම්පූර්ණ තොරතුරක් බව ද සදහන් වේ.

එමෙන්ම සැක කටයුතු පිරිස 06 දෙනෙක් හෝ නැතිනම් 07 දෙනෙකු ලෙස නිශ්චිතව කිව නොහැකි බවටත් කටුනායක ගුවන්තොටුපොළ වෙත තොරතුරු ලැබී ඇතැයි සඳහන්.

කෙසේ වෙතත් මෙම තොරතුර කටුනායක ගුවන් තොටුපොළ වෙත ලද පසුව ගුවන්තොටුපොළ ආරක්ෂක නිලධාරීන්, ශ්‍රී ලංකා ගුවන් හමුදා නිලධාරීන්, ශ්‍රී ලංකා පොලිස් නිලධාරීන් යුධ හමුදා, සිවිල් ආරක්ෂක සේවා සහ බුද්ධි අංශ නිලධාරීන් ඒකාබද්ධව, ගුවන්තොටුපොළ පර්යන්ත ගොඩනැගිලි සහ ඒ අවට ප්‍රදේශයේ සෝදිසි මෙහෙයුමක් දියත් කර තිබූ අතර එහිදී සැක කටයුතු කිසිවෙකුත් අත්අඩංගුවට ගෙන නොමැති බවයි වාර්තා වේ .